21 Апрел 2025
Маҳваш Бойматова – хонандаи синфи 8-и муассисаи давлатии таълимии “Гимназияи №1-и шаҳри Гулистон ба номи академик Бобоҷон Ғафуров” соли ҷорӣ дар даври ҷумҳуриявии олимпиадаи фаннии хонандагон аз фанни забон ва адабиёти рус иштирок намуда, соҳиби ҷойи сеюм ва медали биринҷӣ гардид.
Масъулини шуъбаи моарифи шаҳр, ҳайати омӯзгорони Муассисаи давлатии таълимии “Гимназияи №1-и шаҳри Гулистон ба номи академик Бобоҷон Ғафуров” Маҳваш Бойматоваро дар назди бинои муассиса самимона истиқбол гирифтанд.
Мудири шуъбаи маорифи шаҳр Дилрабо Каримӣ ва директори муассиса Муҳайё Домуллоева иброз доштанд, ки Маҳваш Бойматова яке аз шогирдони фаъоли муассиса мебошад, ки соли таҳсили 2023-2024 низ дар даври ҷумҳуриявии олимпиадаи фаннии хонандагон аз фанни забони давлатӣ соҳиби ҷойи дуюм ва медали нуқра гардида буд ва дар соли хониши 2022-2023 ҳам аз фанни забон ва адабиёти рус сазовори ҷойи сеюм ва медали биринҷӣ гардида буд.
Ҳамзамон, Маҳваш Бойматова ғолиби даври ниҳоии озмуни ҷумҳуриявии “Фурӯғи субҳи доноӣ китоб аст” дар номинатсияи хондан ва аз ёд намудани осори адабиёти классикӣ ва гирандаи стипендияи Президенти Ҷумҳурии Тоҷикистон ва стипендияи раиси шаҳри Гулистон мебошад, ки ҳайати омӯзгорон ва хонандагони муассиса аз дастовардҳои чунин таълимгирандаи муассиса ифтихор менамоянд.
