Ифтитоҳи “Дурахшон”

Раиси шаҳри Гулистон Матлубахон Амонзода ва меҳмонон ба бинои нави Маркази хизматрасонии “Дурахшон” ташриф оварда, онро мавриди баҳрабардорӣ қарор доданд. Дар ин ҷо хатнасури 10 нафар дўстрўякон аз оилаҳои нодор ба вуқўъ пайваст.

Ин Марказ, ки мутааллиқ ба соҳибкорон Набиҷон Зокиров ва Мансурҷон Пўлотов ҳаст аз ошхона, қаҳвахона ва сехи дўзандагӣ иборат мебошад. Айни замон 15 нафар бо ҷойи кори доимӣ таъмин гардиданд.

Истиқбол аз ҷашни Истиқлол

Истиқбол аз 25-солагии Рўзи Истиқлолияти давлатии Тоҷикистон дар маркази шаҳри Гулистон бо чорабиниҳои гуногуни тантанавию фарҳангӣ хотирмону диданӣ баргузор гардид.

Қабл аз оғози нахустчорабинӣ ба собиқадорони меҳнат Римма Беляева, Ҳайдар Муродов, Маҳмуд Холиқов ва Турсунбой Шарифбоев мукофоти пулии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон аз ҷониби Раиси шаҳри Гулистон Матлубахон Амонзода, Вазири саноат ва технологияҳои нави Ҷумҳурии Тоҷикистон Шавкат Бобозода ва Намояндаи Мақомоти иҷроияи ҳокимияти давлатии вилоят Озифхон Шарифзода супорида шуд.

Мадад ба собиқадорон

Пас аз анҷоми ҷамъомади тантанавӣ Раиси шаҳр Матлубахон Амонзода ва меҳмонон бо собиқадорони меҳнат, иштирокчиёни ҷанги Афғонистону садамаи Чернобил ва муҳофизони сохти конститутсионӣ вохўрӣ доир намуда, дар интиҳо ба онҳо маводҳои озуқа супориданд.

Армуғони идона

Дар ҳашт моҳи соли равон корхонаҳои саноатии шаҳри Гулистон бо таъмини мўътадили фаъолияти босамар, истиқболи сазовори ҷашни 25-солагии Истиқлолияти давлатии Тоҷикистон  тавонистанд рушди бомароми истеҳсолотро ба роҳ монда, дар ин давра ба маблағи 1 млрд 237 млн сомонӣ молу амволи ниёзи бозору мардум истеҳсол намуда, нақшаи дурнаморо  140,2 фоиз ба иҷро расониданд, ки аз нишондиҳанда 354,4 млн сомонӣ зиёд аст. Чун ҳамешагӣ дар ташаккули комили маҷмўи маҳсулоти саноатии шаҳр ду корхонаи азими коркарди маъдан: ҶДММ «Ширкати кўҳӣ - саноатии Тоҷикистону Хитой» -80,5 фоиз ва ҶМ ТКММ «Апрелевка» 10,6 фоиз саҳм гузоштанд.

Тибқи маълумоти омор теъдоди умумии кормандони соҳаи саноати шаҳр 3 ҳазору 404 нафарро ташкил дод, ки ин дар муқоиса бо соли гузашта 322 нафар зиёд мебошад.