08 Июл 2026
Санаи 8- уми июл дар толори мақомоти иҷроияи ҳокимияти давлатии шаҳр Маҷлиси фаъолон оид ба ҷамъбасти натиҷаҳои рушди иҷтимоию иқтисодии шаҳри Гулистон дар шашмоҳаи якуми соли 2026 доир гардид. Дар кори ҷаласа директори Агентии таъминоти амволи махсуси назди Ҳукумати Ҷумҳурии Тоҷикистон Савзаалӣ Назирзода ва муовини Раиси вилояти Суғд Зайнура Азимӣ иштирок ва суханронӣ намуданд.
Дар ҷараёни маҷлис муовини аввали Раиси шаҳри Гулистон оид ба соҳаҳои иқтисодӣ Даврон Муҳаммадзода ҳисоботи натиҷаҳои рушди иҷтимоию иқтисодии шаҳрро дар шаш моҳи аввали соли 2026 ба саҳми ҳозирин расонид. Натиҷаҳо мавриди таҳлил қарор дода шуда, зимни суханронӣ зикр гардид, ки дар ин давра ҷиҳати иҷрои дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Ҳукумати Ҷумҳурии Тоҷикистон тадбирҳои мушаххас амалӣ гардида, дар аксари самтҳои хоҷагии халқ нишондиҳандаҳои мусбат ба даст омада истодаанд.
Инчунин аз тарафи Раиси шаҳри Гулистон Илҳом Пӯлотзода махсус қайд гардид, ки рушди соҳаҳои саноат, сохтмон, маориф, тандурустӣ, фарҳанг ва хизматрасонӣ дар маркази таваҷҷуҳи мақомоти иҷроияи ҳокимияти давлатии шаҳр қарор дошта, барои беҳтар намудани сатҳи зиндагии аҳолӣ ва фароҳам овардани ҷойҳои нави корӣ тадбирҳои зарурӣ роҳандозӣ шуда истодаанд.
Зимни суханронӣ директори Агентии таъминоти амволи махсуси назди Ҳукумати Ҷумҳурии Тоҷикистон Савзаалӣ Назирзода ба фаъолияти мақомоти маҳаллӣ баҳои мусбат дода, ҷиҳати истифодаи самараноки имкониятҳои мавҷуда, таъмини иҷрои босифати нақшаҳо ва баланд бардоштани масъулияти роҳбарони сохторҳо тавсияҳои судманд ироа намуд.
Дар анҷоми ҷаласа муовини Раиси вилояти Суғд Зайнура Азимӣ фаъолияти шашмоҳаи мақомоти иҷроияи ҳокимияти давлатии шаҳри Гулистонро таҳлил намуда, барои бартараф намудани камбудиҳои ҷойдошта ва таъмини рушди босуботи иҷтимоию иқтисодии шаҳр ба масъулин супоришҳои мушаххас дод.
Дафтари матбуоти Раиси шаҳр
