Тибқи дастури Раиси шаҳри Гулистон Матлубахон Амонзода гурўҳи корӣ таҳти роҳбарии муовини Раиси шаҳр Ғайрат Оқилзода дар ҳайати мудири шуъбаи рушди иҷтимоӣ ва робита бо ҷомеаи дастгоҳи раиси шаҳр, мудири шуъбаи маориф, мудирони бахши нақлиёт ва коммуникатсия, саноат ва энергетика, меъморӣ ва ҳифзи муҳити зист ба шаҳраки Чоруқдаррон сафари корӣ анҷом дода шуд.
Дар даромадгоҳи шаҳрак бо иштироки ҳайати гурўҳи корӣ, инчунин раиси ҷамоат, директори ҶСШК «КНФЛ», раисони маҳаллаҳо доир ба вазъи даромадгоҳ гуфтугузор ба вуқўъ пайваст, доир ба тоза кардани ду тарафи роҳ аз алафу буттаҳои худрўй, таъмири ҷории роҳ, сохтмонҳои нотамоми канори роҳ, бурриши санитарии дарахтон, ба тартиб даровардани навиштаҷоту овезаҳо, парчаммонак ва тозагии ду даромадгоҳ ба масъулин вазифагузорӣ карда шуд. Ҳамчунин, перомуни ба тартиб даровардани деворҳои тахтагини қади кўчаҳои дохили шаҳрак, иваз кардани шиору овезаҳои куҳнашуда, рангубори деворҳои муҳофизатӣ масъалагузорӣ карда шуданд.
Тибқи иҷрои дастуру супоришҳои Раиси шаҳр Матлубахон Амонзода зимни боздид аз шаҳраки Адрасмон роҷеъ ба вусъати корҳои созандагӣ дар ҳудуди шаҳрак ва деҳоти тобеи он, ҷамоати шаҳрак барои ободони шаҳраки кўҳканон тадбиру чораҳои мушаххас амалӣ мегарданд.
Дар толори ҷамоати шаҳраки Адрасмон дар партави суханронии Асосгузори сулҳу ваҳдати миллӣ-Пешвои миллат, Президенти кишвар муҳтарам Эмомалӣ Раҳмон зимни мулоқот бо фаъолони кишвар бахшида ба 10-солагии қабули Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» мулоқот бо иштироки гурўҳи кории мақомоти иҷроияи ҳокимияти давлатии шаҳр, фаъолони шаҳрак, раисони маҳаллаҳо, фаъолзанон, ҷавонон ва намояндагони иттиҳодияҳои ҷамъиятӣ доир гардид. Раиси ҷамоат Сафар Нурматзода ҷамъомадро ифтитоҳ бахшида, доир ба татбиқи қонуни номбурда дар шаҳрак иттилоъ дод.
Бо мақсади дастгирӣ ва пуштибонӣ аз истеҳсолкунандагони ватанӣ ва фарогирии хонандагон бо либоси ягонаи мактабӣ дар маҷлисгоҳи МТМУ №10-и шаҳраки Зарнисор вохўрии васеи волидайни хонандагон бо кормандони ширкати дўзандагии «Асри тиллоӣ» доир гашт.
Бо дастгирии кумитаи иттифоқи касабаи ҶДММ «ШКСХТ» беш аз 70 нафар хонандагон аз МТМУ № 6,10,15 шаҳраки Зарнисор таътили тобистонаи худро дар лагери тобистонаи «Уқобак»-и шаҳри Истиқлол гузарониданд.
