24 Феврал 2026
Дар толори хурди мақомоти иҷроияи ҳокимияти давлатии шаҳр санаи 23.02.2026 ҷаласаи васеи Комиссияи ҳудудии муқовимат ба савдои одамон дар
назди мақомоти иҷроияи ҳокимияти давлатии шаҳри Гулистон бо иштироки аъзои Комиссияи ҳудудии муқовимат ба савдои одамон, раисони ҷамоати шаҳракҳо ва маҳаллаҳо, кормандони милитсияи шаҳр, роҳбарони воҳидҳои сохторӣ, мудирони шуъбаю бахшҳои мақомоти иҷроияи ҳокимияти давлатии шаҳр ва дигар шахсони масъул баргузор гардид.
Дар кори ҷаласа Раиси шаҳри Гулистон Илҳом Пӯлотзода ва сардори шуъбаи Вазорати корҳои дохилии Ҷумҳурии Тоҷикистон дар шаҳри Гулистон иштирок ва суханронӣ намуданд.
Ҷаласаро Раиси шаҳр Илҳом Пӯлотзода оғоз намуда, зикр кард, ки Комиссияи ҳудудии муқовимат ба савдои одамон дар назди мақомоти иҷроияи ҳокимияти давлатии шаҳр ҷиҳати таъмини иҷрои Қонуни Ҷумҳурии Тоҷикистон “Дар бораи муқовимат ба савдои одамон ва расонидани кумак ба қурбониёни савдои одамон” ва қарори Ҳукумати Ҷумҳурии Тоҷикистон аз 24 июли соли 2025, таҳти №403 “Дар бораи Нақшаи миллии муқовимат ба савдои одамон барои солҳои 2025-2027” чораҳои зарурӣ андешидааст.
Дар ин замина қарори Раиси шаҳри Гулистон аз 3 октябри соли 2025, таҳти №264 “Дар бораи тасдиқи Нақшаи дохилиидоравии муқовимат ба савдои одамон дар мақомоти иҷроияи ҳокимияти давлатии шаҳри Гулистон барои солҳои 2025-2027” қабул гардида буд, ки доир ба иҷрои қарори мазкур аз ҷониби аъзои Комиссияи ҳудудии муқовимат ба савдои одамон, масъулони соҳа ва ҷамоатҳои шаҳрак корбарӣ намуда истодаанд.
Сиёсати давлатӣ дар самти муқовимат ба савдои одамон бо назардошти вазъияти дохилӣ ва берунии муқовимат ба савдои одамон, ҳолати воқеӣ, тамоюл ва пешгӯии афзоиши ин намуди ҷинояткорӣ, инчунин ҳолати расонидани кумак ба қурбониёни савдои одамон дар асоси қонунгузории Тоҷикистон ва санадҳои ҳуқуқии байналмилалии эътирофнамудаи Тоҷикистон, ки ба мубориза бар зидди ҷинояткории муташаккилонаи трансмиллӣ, савдои одамон ва расонидани кумак ба қурбониёни ҷиноятҳои зикргардида равона шудаанд, ташаккул меёбад.
Давлат бо мақсади таъмини ҳифзи ҳуқуқ ва манфиатҳои қонунии қурбониёни савдои одамон, хусусан занҳо ва кӯдакон чораҳои зарурӣ андешида, ба расонидани кумак ба қурбониёни савдои одамон ва таъмини бехатарии онҳо, аз ҷумла тавассути таҳияи барномаҳои давлатии мақсаднок дар ин самт ва муттаҳид намудани фаъолияти субъектҳои системаи давлатии муқовимат ба савдои одамон ва ҷомеаи шаҳрвандӣ диққати махсус медиҳад.
Нақшаи дохилиидоравии муқовимат ба савдои одамон дар мақомоти иҷроияи ҳокимияти давлатии шаҳр барои солҳои 2025-2027” иборат аз 17 банд тасдиқ карда шуда, мавриди корбарӣ қарор дода шудааст.
Бо мақсади таъмини фаъолияти самараноки субъектҳои амаликунандаи муқовимат ба савдои одамон ва ҳамоҳангсозии фаъолияти онҳо дар асоси қарори Раиси шаҳр аз 30 ноябри соли 2017, таҳти №305 Комиссияи ҳудудии муқовимат ба савдои одамон дар назди мақомоти иҷроияи ҳокимияти давлатии шаҳр таъсис дода шудааст, фаъолият менамояд.
Чорабиниҳои иттилоотию фаҳмондадиҳӣ, тарғиботию ташвиқотӣ бо иштироки воситаҳои ахбори омма оид ба баланд бардоштани сатҳи огаҳии аҳли ҷомеа дар бораи мушкилоти савдои одамон ва чораҳои андешидаи мақомоти салоҳиятдор ва иттиҳодияҳои ҷамъиятӣ дар байни аҳолӣ ва ҷомеаи меҳнатии корхонаву ташкилотҳо доир карда мешаванд.
Сипас, дар самти муқовимат ба савдои одамон аъзои Комиссияи ҳудудӣ, сардори шуъбаи Вазорати корҳои дохилии Ҷумҳурии Тоҷикистон дар шаҳри Гулистон, подполковники милитсия Раҳимзода Мирзоватан Мирзораҳим суханронӣ намуд. Мафҳумҳои асосии Қонуни Ҷумҳурии Тоҷикистон “Дар бораи муқовимат ба савдои одамон ва расонидани кумак ба қурбониёни савдои одамон”, тарзҳои содир гардидани ҷиноятҳо дар самти савдои одамон, аз ҷумла ҷалб намудани одамон ба меҳнати маҷбурӣ, истисмори шаҳвонӣ, талбандагӣ ва дигар тарзҳои содир гардидани онҳо ба ҳозирин фаҳмонда дода шуд.
Баъди анҷоми баррасӣ, муҳокима ва таҳлили мавзӯи рӯзномаи ҷаласа бо назардошти таклифу пешниҳоди аъзоёни Комиссияи ҳудудии муқовимат ба савдои одамон дар назди мақомоти иҷроияи ҳокимияти давлатии шаҳр барои пешрафту беҳтар намудани кор дар ин самт ба масъулон супоришҳои мушаххас дода шуд.
