28 Ноябр 2025
Соҳили зебоманзари “Баҳри тоҷик” яке аз мавзеъҳои дилфиреби шаҳри Гулистон буда, ҳамасола ҳазорҳо меҳмонону сайёҳон аз дохил ва хориҷи кишвар барои истироҳату фароғат ба ин ҷо рӯ меоранд.
Зебоиҳои табиӣ боис гардида, ки солҳои охир дар ин минтақа корҳои созандагиву ободонӣ рушд ёфта, барои қабули сайёҳону гардишгарон имкониятҳои беҳтар фароҳам оварда шавад.
Бо дарки муҳимияти рушди соҳаи сайёҳӣ ва истифодаи самараноки имкониятҳои табиӣ бо ташаббуси соҳибкори маҳаллӣ Турсуной Зокирова дар соҳили “Баҳри тоҷик” бунёди осоишгоҳи нав ҷараён дорад . Тибқи лоиҳа осоишгоҳ барои қабули 250 истироҳаткунанда пешбинӣ шудааст. Баъди ба истифода додани иншоот даҳҳо сокини маҳаллӣ бо ҷойи кори доимӣ таъмин хоҳанд шуд.
Раиси вилояти Суғд Раҷаб Аҳмадзода зимни боздид аз ҷараёни корҳои сохтмонӣ ба соҳибкор ва масъулони соҳаи меъморӣ дастур дод, ки ба раванди корҳои сохтмонӣ суръат бахшанд.
Дар баробари осоишгоҳ дар ҳамин мавзеъ бо саҳми соҳибкор Турсуной Зокирова бунёди тарабхонаи муосир низ идома дорад. Иншооти мазкур низ бо услуби миллӣ ва тарҳи замонавӣ сохта шуда, ба беҳтар гардидани имкониятҳои хизматрасонӣ барои меҳмонон мусоидат хоҳад кард.
Тавре масъулон иброз медоранд, ҳар як иншооти ҷашнӣ дар баробари фароҳам овардани шароити хуби хизматрасонӣ, ба ободу зебо гардидани симои шаҳр саҳми назаррас мегузорад.
Айни ҳол дар шаҳри Гулистон 5 осоишгоҳ фаъолият дорад. Бунёди осоишгоҳу тарабхонаи нав ба истиқболи 35–солагии Истиқлоли давлатӣ имконият фароҳам меорад, ки сатҳи қабули меҳмонону сайёҳон боз ҳам баланд гардида, ҷойгоҳи шаҳри Гулистон ҳамчун маркази истироҳативу сайёҳӣ мустаҳкамтар шавад.
