12 Июн 2025
Имрӯз, 12.06.2025 тибқи нақшаи тасдиқгардида аз ҷониби Шӯрои вилоятии Ҳаракати ҷамъиятии ваҳдати миллӣ ва эҳёи Тоҷикистон ва нақшаи кории мақомоти иҷроияи ҳокимияти давлатии шаҳр дар толори бахши ҳифзи муҳити зисти шаҳр маҳфили илмию адабии “Адибони Ваҳдатсаро” таҳти унвони “Менависам ман суруди сулҳро бо хуни дил” ба ифтихори 28-умини солгарди Рӯзи Ваҳдати миллӣ бо иштироки кормандони соҳаҳои гуногуни хоҷагии халқи шаҳр баргузор гардид.
Дар маҳфили мазкур Аъзам Ҳотамӣ ва Мирпочоева Мавҷуда намояндагони Шурои вилоятии Ҳаракати ҷамъиятии ваҳдати миллӣ ва адибон аз шаҳри Гулистон Лутфӣ Мамадҷонова, шоир, сармуҳаррири рӯзномаи "Соҳил" ва Фаридуншоҳ Абдуллоев, нависанда, мудири бахши ҷавонони КИ ҲХДТ дар шаҳр суханронӣ намуданд.
Зикр карда шуд, ки мардуми тоҷик пас аз ҳазор соли аз байн рафтани давлати Сомониён санаи 9 сентябри соли 1991 бо эълон гардидани Эъломияи Истиқлоли Тоҷикистон боз аз нав соҳибдавлат гардиданд. Номи Тоҷикистони навин, ки фарзандони ин сарзамин бо илму фарҳанги хеш асрҳо қалби оламиёнро тасхир намуда буданд дар харитаи сиёсии ҷаҳон арзи ҳастӣ намуд.
Мутаассифона дар оғоз ин навиди хуҷаста, кишвари мо ба гирдоби ҷанги шаҳрванӣ гирифтор шуд. То ба имзорасии Созишномаи истиқрори сулҳи тоҷикон ҳашт даври гуфтушуниди роҳбарияти кишвар таҳти сарварии Президенти кишвар муҳтарам Эмомалӣ Раҳмон бо ҳайати мухолифини давлат баргузор гардид.
Ҳаминтавр, санаи 27-уми июни соли 1997 дар шаҳри Маскав Созишномаи истиқрори сулҳи байни тоҷикон ба имзо расонида шуд, ки қадами нахустин дар роҳи осоиштагиву сулҳу сафои кишвар гардид.
Минбаъд, кишвари тозаҷавони мо зери роҳбарии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бомаром рушду равнақ намуда истодааст.
Бе муболиға, рӯзи ба имзо расидани Созишномаи истиқрори сулҳ барои миллату давлатамон санаи бузургтарини тақдирсозу саодатофар ба шумор меравад.
Мо имрӯз бояд шукрона кунем, ки зери сиёсати хирадмандонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Ватани озоду обод рӯзгори осоиштаи худро пеш мебарем. Ва пеш аз ҳама мо бояд ба қадри Истиқлолият ва Ваҳдати миллӣ бирасем.
Адибон доир ба Ваҳдати миллӣ аз эҷоди худ ва дигар адибон шеърҳо қироат намуданд.
