22 Апрел 2025
Машарипова Зулайхо - хонандаи синфи 10-и муассисаи таҳсилоти миёнаи умумии №10-и шаҳраки Зарнисори шаҳри Гулистон нафаре мебошад, ки дар таърихи муассиса аввалин медалро аз даври ҷумҳуриявии Олимпиадаи фаннии хонандагон ба хазинаи дастовардҳои муассиса ворид намуд. Машарипова Зулайхо дар даври ҷумҳуриявии Олимпиадаи фаннии хонандагон аз фанни забони руст соҳиби ҷойи сеюм ва медали биринҷӣ гардид.
Дар даромадгоҳи муассисаи таълимӣ масъулини ҷамоати шаҳрак, ҳайати омӯзгорон ва хонандагони муассиса ғолиби Олимпиадаро бо шукуҳ истиқбол гирифтанд.
Директори муассиса Абдумалик Расулов ғолиб ва омӯзгори роҳнамои ӯро бо ба даст овардани ин натиҷаи бузург барои муассиса самимона муборак бод гуфта, онҳоро бо ифтихорномаи муассиса қадрдонӣ намуд.
Шаҳраки Зарнисори шаҳри Гулистон аз маркази шаҳр дар фосилаи беш аз 100 км мавқеъ дорад ва дар ҳудуди он 3 муассисаи таҳсилоти миёнаи умумӣ фаъолият доранд. Бо дастгирии мақомоти иҷроияи ҳокимияти давлатии шаҳр муассисаҳои таълимӣ аз таъмири куллӣ бароварда шудаанд. Ҳамчунин, ба муассисаҳои таълимии шаҳрак таҷҳизоти замонавӣ барои таълим фароҳам оварда шудааст.
Натиҷаи ин ғамхориҳост, ки солҳои охир хонандагони муассисаҳои таълимии шаҳрак дар озмунҳои ҷумҳуриявӣ, олимпиадаҳо, озмунҳои гирандаи Стипендияи Президентӣ, стипендияи раиси шаҳр ва озмуни Квотаи Президентӣ фаъолона иштирок намуда, ҷойҳои намоёнро соҳиб гардида истодаанд.
