22 Май 2024
Дар толори Кумитаи иҷроияи Ҳизби Халқии Демократии Тоҷикистон дар шаҳри Гулистон бахшида ба «Рӯзи ҷавонони Тоҷикистон» конференсия таҳти унвони «Ҷавонон- пайравони Пешвои миллат» бо иштироки вакилон, раисони ташкилотҳои ибтидоӣ, роҳбарони корхонаҳо, фаъолони ҳизб, собиқадорон, бонувону ҷавонон, аъзои ташкилоти ҷамъиятии ҷавонон «Созандагони Ватан» ва донишҷӯёни коллеҷи тиббии шаҳр роҳандозӣ гардид.
Бо садо додани Суруди миллӣ конференсия оғоз ёфт.
Нахуст, Раиси Кумитаи иҷроияи Ҳизби Халқии Демократии Тоҷикистон дар шаҳри Гулистон Ҷамолиён Муслимахон Ғайбуллозода мақсад ва ҳадафи баргузории конференсияро ба саҳми ҳозирин расонид.
Сипас, Шарифҷони Саидраҳмон – муовини раиси шаҳри Гулистон зимни баромади хеш табрикоти раиси шаҳри Гулистон Раъно Ҳишмзода бахшида ба Рӯзи ҷавонони Тоҷикистонро расонида, иброз дошт, ки дар партави ғамхорӣ ва ҳидоятҳои Асосгузори сулҳу ваҳдати миллӣ- Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон ҷавонони Тоҷикистон ҳамчун нерӯи бузург, ояндасоз баҳри фардои дурахшони кишвар саҳмгузоранд.
Мухтор Толибзода – мудири шуъбаи таблиғот ва иттилооти Кумитаи иҷроияи Ҳизби Халқии Демократии Тоҷикистон дар вилояти Суғд зикр намуд, ки Раиси муаззами Ҳизби Халқии Демократии Тоҷикистон Президенти кишвар муҳтарам Эмомалӣ Раҳмон бо ҷавонони кишвари худ ифтихор доранд, зеро ҷавонон дар рушди давлат ва ободии Ватан фаъоланд, марзу буми сарзамини аҷдодиро ҳимоя мекунанд, ватандӯсту ватанпараст, бонангу номусанд ва ба халқу давлати Тоҷикистон содиқ мебошанд.
Маърӯзачиён мудири бахши кор бо ҷавонон ва варзиши мақомоти иҷроияи ҳокимияти давлатии шаҳри Гулистон - Аҳлиддин Абдураҳмонов, сармутахассиси Маркази дарёфти рушди истеъдодҳо шуъбаи маорифи мақомоти иҷроияи ҳокимияти давлатии шаҳр Дилноза Пулотова, аъзои Ташкилоти ҷамъиятии ҷавонон”Созандагони Ватан” Зинҳор Раҳматов ва Шукрона Рӯзибойзода дар мавзӯъҳои “ Ҷавонони даврони соҳибистиқлол”, “ Хизмат ба Ватан-шараф аст! ”, “Пешвои миллат” ва “Тоҷикистони маҳбуб” баромад намуданд.
Раиси Кумитаи иҷроияи Ҳизби Халқии Халқии Демократии Тоҷикистон дар шаҳри Гулистон Ҷамолиён Муслимахон Ғайбуллозода иброз дошт, ки ҷавонони саодатманд, зодагони даврони соҳибистиқлоли кишвари маҳбубамон, пайравони роҳбари бохиради Ҳизби Халқии Демократии Тоҷикистон Асосгузори сулҳу ваҳдати миллӣ-Пешвои миллат аз муҳаббату самимияти беандозаи Президенти кишвар муҳтарам Эмомалӣ Раҳмон пайваста баҳравар буда, пайрави ҳамешагии ин шахсияти беназир дар роҳи созандагиву бунёдкории ватани биҳиштосоямон -Тоҷикистон то абад боқӣ мемонанд. Насли наврасу ҷавон сиёсати хирадмандонаву дурандешона ва бунёдкоронаи Пешвои миллатро пайравӣ намуда, дар таҳкими истиқлолият, пойдории сулҳу ваҳдат, ҳимояи манфиатҳои миллӣ ва пешрафту тараққиёти давлат арҷ гузошта, бо донишу маърифат, ҷаҳонбинии васеъ ва заковати баланди худшиносию ватанпарастӣ барои ба кишварҳои мутамаддин баробар гардидани Тоҷикистони азиз саҳми арзанда мегузоранд.
Дар фарҷоми конференсия ба аъзои навинтихоби Ҳизби Халқии Демократии Тоҷикистон шаҳодатномаҳои ҳизбӣ, ба ҷавонони фаъол ва пешқадамон аз соҳаҳои гуногун медали ҷашнии Ҳизби Халқии Демократии Тоҷикистон, Сипосномаҳои Кумитаи иҷроияи Ҳизби Халқии Халқии Демократии Тоҷикистон дар шаҳри Гулистон дар вазъияти тантанавӣ супорида шуд.
Конференсия бо садо додани Суруди миллӣ ба итмом расид.
