04 Май 2021
Мақомоти иҷроияи ҳокимияти давлатии шаҳри Гулистон ба самъи Шумо мерасонад, ки дар шаҳри Гулистон корҳои ободонӣ ва хуррамгардонӣ вусъат ёфта, барои ободу зебо ва хуррам гардонидани шаҳр як қатор корҳо ба анҷом расидаанд. Аз ҷумла, бунёд ва таҷдиди боғҳо, гулгаштҳои замонавӣ, майдончаҳои варзишӣ ва бачагона, чароғонкунии шафати роҳҳои нақлиётгард, хонаҳои баландошёна, сафолакпӯш намудани роҳҳои пиёдагард, шинонидани дарахтони ороишӣ, мевадиҳанда, гулҳои мавсимӣ ва монанди онҳо.
Бояд қайд кард, ки барои амалӣ намудани корҳои дар боло зикршуда хеле маблағҳои зиёд сарф шуда истодааст. Барои ба иҷро расонидани корҳои зикршуда маблағи буҷети маҳал нокифоя буда, соҳибкорон, саховатмандон ва корхонаю муассисаҳо дастгирӣ намуда истодаанд. Корҳои ободонӣ, хуррамгардонӣ танҳо барои истироҳати бемайлони халқи азизи шаҳр ва меҳмонон мебошад.
Бинобар ин ба диққати сокинон ва меҳмонон расонида мешавад, ки барои худсарона буридани дарахту буттаҳо, ки барои кабудизору ободонии шаҳр ва дигар маҳаллаҳои аҳолинишин таъин гардиданд ё расонидани зарар ба онҳо, риоя накардани қоидаҳои истифодабарии биною манзили истиқоматӣ, қоидаҳои нигоҳдошти ҳолати санитарии ҷойҳои истифодаи умум, қоидаҳои ободонии ҳудуди шаҳр, партофтан ва сӯзонидани партовҳою ашёҳо дар ҷойҳои муқаррарнашуда, нодуруст иҷро кардани уҳдадориҳои тарбиявии фарзандон нисбат ба волидайн ё намояндагони қонунии онҳо тибқи муқаррароти Қонуни Ҷумҳурии Тоҷикистон “Дар бораи масъулияти падару модар дар таълиму тарбияи фарзанд”, Кодекси ҳуқуқвайронкунии маъмурии Ҷумҳурии Тоҷикистон ва Кодекси ҷиноятии Ҷумҳурии Тоҷикистон ҷавобгарии маъмурӣ ва ҷиноӣ пешбинӣ шудааст, ки маблағи ҷаримаи он зиёда аз 3000 сомониро ташкил медиҳад.
Лозим ба зикр аст, ки халқи тоҷик аз қадимулайём ҳамчун халқи бомаданият, бофарҳанг ва соҳибтамаддун шинохта шудааст. Моро зарур аст, ки расму русуми ниёгони худро ҳифз намоем, ба нигаҳдошти ашёи ҷамъиятӣ бемасъулиятӣ зоҳир нанамоем, тозагиву покизагиро риоя намуда, партовҳоро дар қади кӯча напартоем, ба ҳар ҷой либос наовезем, ба деворҳо ҳар гуна сухану нақшҳо накашем ва ба ҳамаи ин падару модарон ва калонсолон масъулем.
Вобаста ба ин, аз падару модарон эҳтироман хоҳиш карда мешавад, ки ба фарзандони худ маданияти шаҳрдориву шаҳрнишиниро омӯзонанд ва пеш аз ҳама худ намунаи ибрат бошанд ва дар якҷоягӣ барои ободиву шукуфоии шаҳри азизамон саҳмгузор бошем.
Мақомоти иҷроияи ҳокимияти
давлатии шаҳри Гулистон
