06 Январ 2022
Дар толори бахши фарҳанги шаҳри Гулистон санаи 06.01.2022 тибқи барқияи Мақомоти иҷроияи ҳокимияти давлатии вилояти Суғд хониши сиёсӣ таҳти унвони “Паёми Пешвои миллат – ҳидоятномаи халқ ба сӯи фардои дурахшон” баргузор гардид. Дар хониши сиёсӣ тарғиботчиён аз муассисаҳои олии вилоят Ҷӯрабек Исомидинов, номзади илмҳои таърих, дотсент, мудири кафедраи таърихи ватан ва археологияи МДТ “Донишгоҳи давлатии Хуҷанд ба номи академик Бобоҷон Ғафуров”, Сафар Эркаев, номзади илмҳои таърих, дотсенти кафедраи таърихи ватан ва археологияи МДТ “Донишгоҳи давлатии Хуҷанд ба номи академик Бобоҷон Ғафуров” ва Мазбут Ҳомидов, номзади илмҳои техникӣ иштирок ва суханронӣ намуданд. Аз соҳаҳои гуногуни хоҷагии халқи шаҳр кормандон дар хониши сиёсӣ иштирок доштанд.
Зикр гардид, ки Паёми навбатии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон «Дар бораи самтҳои асосии сиёсати дохилӣ ва хориҷии ҷумҳурӣ» ба Маҷлиси Олии кишвар, ки санаи 21-уми декабри соли 2021 ироа гардид фарогири ҳамаи самтҳои хоҷагии халқи кишвар мебошад. Он гуна ки ба назар расид дар бист соли охир рушди миёнасолонаи иқтисодиёт дар сатҳи 7,5 фоиз таъмин гардида, маҷмӯи маҳсулоти дохилии мамлакат аз 1,8 миллиард сомонии соли 2000-ум то 95 миллиард сомонӣ дар соли 2021 ва даромади буҷети давлатӣ аз 252 миллион сомонӣ ба 28 миллиард сомонӣ расонида шудааст. Дар ин давра дар кишвар зиёда аз 2000 корхонаи истеҳсолӣ бунёд гардида, ҳаҷми истеҳсоли маҳсулоти саноатӣ нисбат ба солҳои аввали соҳибистиқлолӣ қариб чор баробар афзоиш пайдо намудааст.
Ҳамчунин, аз Паём ёдоварӣ карда шуд, ки дар даврони соҳибистиқлолӣ ҳукумати кишвар бунёди маорифи миллӣ ва ворид гардидан ба фазои таҳсилоти байналмилалиро ҳадафи муҳимтарин ва самти афзалиятноки сиёсати иҷтимоии давлат ва Ҳукумати мамлакат қарор дод. Зеро бунёди миллат аз маориф оғоз меёбад ва ғамхорӣ нисбат ба маориф – сармоягузорӣ барои рушди неруи инсонӣ ва ояндаи ободи давлат ва Ватан мебошад.
Дар хониши сиёсӣ нуктаҳои асосии Паёми Пешвои миллат муҳтарам Эмомалӣ Раҳмон шарҳу тавзеҳ дода шуданд. Дар фарҷом аз иштирокдорон даъват ба амал оварда шуд, ки мову Шуморо зарур аст, ки Паёми Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии кишварро бо рӯҳияи баланди ифтихор аз ватандориву соҳибистиқлолӣ қабул намуда, онро чун барномаи мушаххаси рушди минбаъдаи иқтисодиёту иҷтимоиёт ва сармашқи кори худ қарор диҳем.
