03 Август 2025
Интизор меравад, ки моҳи сентябри соли 2025 таҷдид дар Неругоҳи барқи обии «Қайроқум» пурра ба итмом расад, иттилоъ медиҳад АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон.
1 август Вазири энергетика ва захираҳои оби Ҷумҳурии Тоҷикистон Далер Ҷумъа дар вилояти Суғд бо корҳои таҷдид дар Неругоҳи барқи обии «Қайроққум» шинос шуд.
Масъулини соҳа ба Вазири энергетика ва захираҳои об иттилоъ доданд, ки то имрӯз 5 агрегати неругоҳ таҷдид гардида, корҳои навсозӣ тибқи нақша дар агрегати охирин идома доранд. Мутобиқи маълумоти пешниҳодшуда, интизор меравад, ки моҳи сентябри соли 2025 таҷдид дар неругоҳ пурра ба итмом расад.
Бо татбиқи пурраи лоиҳаи таҷдид иқтидори истеҳсолии Неругоҳи барқи обии «Қайроққум» аз 126 МВт ба 174 МВт расонида мешавад. Ин ба 48 МВт афзоиш ёфтани иқтидор нисбат ба нишондиҳандаҳои қаблӣ баробар аст.
Татбиқи ин лоиҳа имконият медиҳад, ки самаранокии кори неругоҳ зиёд шуда, таъминоти барқи боэътимод ба минтақаҳои шимолии мамлакат боз ҳам беҳтар гардад.
АМИТ «Ховар»
