27 Апрел 2021
Имрӯз Раиси шаҳр Бахтиёр Саидаҳмадзода бо мақсади шиносоӣ аз фаъолияти соҳаҳои хоҷагии халқи ҷамоати шаҳраки Сирдарё боздид ба амал овард.
Дар ибтидо Раиси шаҳр аз нуқтаҳои сӯзишвории шафати роҳи асосии ҳудуди шаҳрак дидан намуд. Иттилоъ дода шуд, ки дар шаҳр ҳамагӣ 8 нуқтаҳои хизматрасонии сӯзишворӣ фаъолият дорад. Ҳамчунин, ба масъулини марказҳои фурӯши сӯзишворӣ доир ба саҳм гузоштан дар корҳои ободонӣ, кабудизоркунӣ ва рангубори атроф супоришҳо дод.
Баҳри сазовор истиқбол намудани ҷашни таърихӣ – 30-юмин солгарди Истиқлолияти давлатии Ҷумҳурии Тоҷикистон тибқи нақшаи чорабиниҳо дар ҷамоати шаҳраки Сирдарё бунёди 19 иншооти ҷашнӣ ба қайд гирифта шуда, 14-тои он ба истифода дода шудааст ва дар 5 иншооти дигар корҳо бомаром идома доранд. Раиси шаҳр Бахтиёр Саидаҳмадзода баҳри босифат ва саривақт ба иҷро расонидани нақшаи иншооти ҷашнӣ дастуру супоришҳои мушаххас дод.
Ҳамчунин, аз ҷониби Раиси шаҳр Бахтиёр Саидаҳмадзода бо фаъолони ҷамоати шаҳраки Сирдарё қабули шаҳрвандон доир гардид.
Дар қабули шаҳрвандон, сокинон оид ба масъалаҳои системаи гармидиҳӣ дар муассисаи таҳсилоти миёнаи умумии №8, вазъи экологӣ, корҳои гигиенӣ масъалаи хонаи истиқоматӣ, корҳои ободонӣ ва таъмин намудани шаҳрвандон бо хатсайр муроҷиат намуданд. Раиси шаҳр ҷиҳати ҳалли мушкилот масъулини сохторҳои дахлдорро вазифадор намуд.
Ҳамзамон, Раиси шаҳр Бахтиёр Саидаҳмадзода ба масъулини ҷамоати шаҳрак нисбат ба чора андешидан доир ба масъалаҳои ободонии шаҳрак, корҳои фаҳмондадиҳӣ доир ба пешгирии бемориҳои сироятӣ, шомилшавии ҷавонон ба ҳизбу ҳаракатҳои тундрав, пешгирии ҷинояткорӣ, пешгирии ҷудошавии оилаҳо, пардохти саривақтии ҳаққи истифодаи қувваи барқ ва хоҷагии манзилию комуналӣ, ислоҳ намудани камбудиҳои ҷойдошта дар муҳлати кутоҳ супоришҳои мушаххас дод.
