19 Октябр 2020

Дар толори калони Мақомоти иҷроияи ҳокимияти давлатии шаҳр иҷлосияи сеюми Маҷлиси вакилони халқи шаҳр, даъвати шашум таҳти раёсати раиси Маҷлиси вакилони халқи шаҳр, Раиси шаҳри Гулистон Фирдавс Шарифзода баргузор гардид.

Иҷлосияи Маҷлиси шаҳрӣ бо танинандозии Суруди миллии Ҷумҳурии Тоҷикистон ифтитоҳ ёфт.

Сараввал котибот, рӯзномаи иҷлосия тасдиқ гардид. Доир ба масъалаи асосӣ “Дар бораи баррасӣ намудани нақшаи чорабиниҳои мақомоти иҷроияи ҳокимияти давлатии вилояти Суғд оид ба амалисозии марҳилаи сеюми “Барномаи дастгирии давлатии соҳибкорӣ дар Ҷумҳурии Тоҷикистон барои солҳои 2010-2020” муовини якуми Раиси шаҳри Гулистон Нуринисо Комилзода маърӯза намуд.

Зикр гардид, ки Мақомоти иҷроияи ҳокимияти давлатии шаҳри Гулистон ҷиҳати иҷрои Барномаи мазкур ва қарори Раиси вилояти Суғд аз 30-юми майи соли 2018, №225 «Дар бораи тасдиқи Нақшаи чорабиниҳо оид ба амалисозии марҳилаи сеюми Барномаи дастгирии давлатии соҳибкорӣ дар Ҷумҳурии Тоҷикистон барои солҳои 2012-2020», ки бо қарори Ҳукумати Ҷумҳурии Тоҷикистон аз 28-уми апрели соли 2018, №227 тасдиқ гардидааст, қарори раиси шаҳри Гулистон 5-уми июни соли 2018, №123 «Дар бораи ба корбарӣ гирифтани қарори Ҳукумати Ҷумҳурии Тоҷикистон дар бораи Нақшаи чорабиниҳо оид ба амалисозии марҳилаи сеюми Барномаи дастгирии давлатии соҳибкорӣ дар Ҷумҳурии Тоҷикистон барои солҳои 2012-2020» ба тасвиб расид. Ҳамзамон, дар давраи ҳисоботӣ баҳри муайян намудани роҳҳои рушди соҳибкорӣ дар ҳудуди шаҳр чораҳои мушаххас ва амалӣ андешида шуданд.

Аъзои комиссияи доимӣ вакил аз ҳавзаи интихоботии “Саъдӣ” №29 Ғуфронҷон Абдуллоев оид ба ҳисоботи комиссияи доимии Маҷлиси вакилони халқи шаҳр оид ба масъалањои саноат, сохтмон, алоқа, хоҷагии коммуналӣ ва хизматрасони ба аҳолӣ маърӯза намуд. Дар бораи ҳисоботи ваколатҳои вакилӣ вакил аз ҳавзаи интихоботии “Зарзамин” №15 Парвиз Аҳмадҷонов суханронӣ кард.Сипас вакилон қарорҳои Раиси шаҳри Гулистонро тасдиқ намуданд.

Дар кори иҷлосия намояндаи мақомоти иҷроияи ҳокимияти давлатии вилояти Суғд Маҳмадӣ Давлатов иштирок дошт.

Иҷлосияи Маҷлиси шаҳрӣ бо танинандозии Суруди миллии Ҷумҳурии Тоҷикистон ҳусни анҷом пазируфт.