Мо бояд сиёсати иқтисодии худро тарзе ба роҳ монем, ки тавассути истифодаи самараноки захираву имкониятҳои мавҷуда ва дигар дороиҳо рақобатнокии иқтисоди миллӣ баланд бардошта шавад.

Эмомалӣ Раҳмон

Бо фаро расидани Рӯзи геологҳо кормандону мутахассисони соҳаро, ки тамоми қувва, дониш ва таҷрибаву малакаи худро баҳри ҳарчи бештар дарёфт кардани захираҳои нави сарватҳои зеризаминӣ ва мавриди баҳрабардорӣ қарор додани онҳо сарф намуда, дар рушд ва тараққиёти саноати кӯҳӣ саҳми арзанда мегузоранд, бо иди касбиашон табрик мегӯям. Ба ҳамаи онҳо тани сиҳату хотири ҷамъ, хонаободӣ ва дар иҷрои нақшаҳо муваффақиятҳои беназир  орзу менамоям.

Сарзамини мо аз қадим бо сарватҳои табиии худ шӯҳрату ифтихор дошт ва мардум ҳамеша онҳоро барои таъмини пешрафти диёр ва беҳдошти зиндагӣ истифода мебурданд.

Дар замони Истиқлолияти кишвари азизамон соҳаи геология ба яке аз соҳаҳои муҳими хоҷагии халқ табдил ёфт. Давлат ва Ҳукумати Ҷумҳурии Тоҷикистон бо ҳидояти Президети кишвар, Ҷаноби Олӣ, муҳтарам Эмомалӣ Раҳмон рушди ин соҳаро ҳамчун яке аз самтҳои афзалиятноки сиёсати иқтисодӣ муайян намуда, баҳри пешрафт ва тараққиёти он тамоми чораҳои заруриро андешида истодаанд. Геологҳо бошанд, ҳамарӯза баҳри ҷустуҷӯю дарёфти конҳои нав, истихроҷ ва коркарди ашё, ки барои истеҳсоли нуриҳои минераливу маводи сохтмон хеле заруранд, ҳамчунин дар обёрӣ намудани заминҳо ва беҳтар намудани ҳолати мелиоративии онҳо саҳми арзанда мегузоранд.

Боварӣ дорам, ки геологҳои шаҳр анъанаҳои меҳнатии худро таҳким дода, бо амалӣ намудани барномаву нақшаҳои иқтисодӣ дар пешрафти ҷомеа саҳми арзанда мегузоранд.

Идатон муборак, кашшофони сарватҳои зеризаминӣ!