Яке аз масъалаҳои умдаи Паёми имсолаи Президенти мамлакат Эмомалӣ Раҳмон мубориза бар зидди коррупсия мебошад. Ба хотири амалӣ намудани дастуру супоришҳои Сарвари давлат, амалисозии нуктаҳои дар ҷаласаи васеъи Шӯрои амнияти ҷумҳурӣ зикрёфта ва ба самъи шаҳрвандон расонидани баромади директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон (августи соли 2015) Рустами Эмомалӣ дар Мақомоти иҷроияи ҳокимияти давлатии вилояти Суғд, тадбиқи фармони Президенти мамлакат дар бораи даъвати тирамоҳии ҷавонон ба сафи Қувваҳои Мусаллаҳ таҳти №250, аз 30 сентябри соли ҷорӣ дар толори Мақомоти иҷроияи ҳокимияти давлатии шаҳри Қайроққум санаи 26 октябр вохӯрӣ баргузор гардид.

Дар вохӯрӣ сардори шуъбаи пешгирии коррупсияи Раёсати Агентии назорати давлатии молиявӣ ва мубориза бо коррупсияи ҶТ дар вилояти Суғд Наимҷон Саломов ва ваколатдори фаврӣ оид ба корҳои махсусан муҳими Раёати номбурда Султонмурод Исломов иштирок доштанд.

Чорабиниро Раиси шаҳри Қайроққум Матлубахон Амонзода ифтитоҳ намуда оид ба зуҳуроти хавфноки ҷомеа, аз байн бурдани он ва дар ин самт ҷалби бештари ҷомеаи шаҳрвандӣ бо ҳадафи ҷоннок кардани муқовимат бо коррупсия ҳарф зад. Баъдан сардори шуъбаи пешгирии коррупсияи Раёсати Агентии назорати давлатии молиявӣ ва мубориза бо коррупсияи ҶТ дар вилояти Суғд Наимҷон Саломов дар мавзӯи «Пешгирии содиршавии омилҳои коррупсионӣ» баромад карда таваҷҷуҳи  ҳозиринро ба Қонуни ҶТ «Дар бораи мубориза бар зидди коррупсия» ва масоилҳои дар боло зикр гардида ҷалб ва маълумоти муфассал дод. Аз ҷумла қайд гардид, ки соли равон 9 ҷинояти коррупсионӣ аз ҷониби шаҳрвандони шаҳри Қайроққум сар задааст, ки ин боиси нигаронист.

Дар фарҷоми вохӯрӣ Раиси шаҳри Қайроққум Матлубахон Амонзода таъкид дошт, ки тибқи нақша-чорабинии Шӯрои шаҳрӣ тамоми самти фаъолиятро баҳри пешгирии ҳолатҳои коррупсионӣ равона намуда, дар кадом шакле набошад онро маҳкум менамоянд.