Дар майдони Нишони давлатии Ҷумҳурии Тоҷикистон шаҳри Гулистон маросими ботантана гуселонидани даъватшавандагони гулистонӣ ба сафи Қувваҳои мусаллаҳи Ҷумҳурии Тоҷикистон баргузор гардид.

Чорабинӣ бо садо додани Суруди миллии Ҷумҳурии Тоҷикистон ифтитоҳ ёфт.

Раиси шаҳри Гулистон Фирдавс Шарифзода даъватшавандагонро ба ин муносибат таҳният намуд. Зикр карда шуд, ки Артиши миллии Ҷумҳурии Тоҷикистон такягоҳи боэътимоди давлат ва сипари иқтидорманди миллат мебошад. Ташкил ва таъсиси Қувваҳои мусаллаҳи Ҷумҳурии Тоҷикистон тавассути сиёсати хирадмандонаи Асосгузори сулҳу ваҳдати миллӣ-Пешвои миллат, Президенти мамлакат, Сарфармондеҳи олии Қувваҳои мусаллаҳи Ҷумҳурии Тоҷикистон муҳтарам Эмомалӣ Раҳмон дар як давраи кӯтоҳ ва хеле душвору сангин ба вуқӯъ пайваст.

Имрӯз Қувваҳои мусаллаҳи Ҷумҳурии Тоҷикистон ҳам аз лиҳози таъминоти моддию техникӣ, ҳам аз ҷиҳати қудрату тавоноӣ ва маҳорати ҳарбӣ ва интизоми ҳайати шахсӣ аз солҳои пешин афзалияти зиёду бештар дорад. Боиси ифтихормандӣ аст, ки имрӯз мамлакати мо тамоми марзи сарҳади давлатиро пурра бо қувваи худ муҳофизат менамояд. Хизмат дар сафи Қувваҳои мусаллаҳи Ҷумҳурии Тоҷикистон мактаби олии обу тоби зиндагӣ ва касби камолот мебошад. Фарзандони баруманди тоҷикистонӣ дар давоми хизмати ҳарбӣ ба маънии томи мафҳумҳои Ватану ватандорӣ, садоқату матонат, нангу номус ва шарафу виҷдон хеле амиқ расида, обу тоби ҷисмонӣ ва маънавӣ мегиранд. Дар марҳилаи ҳозира таъминоти моддию техникии Артиши миллии Тоҷикистон ҷавобгӯи замони муосир мебошад.

Сипас собиқадори Қувваҳои мусаллаҳи Ҷумҳурии Тоҷикистон Музаффар Бобоҷонов, модари даъватшаванда Мавлуда Мавлонова, даъватшавандаи ихтиёрӣ Мирсалим Исмоилов суханронӣ намуданд.

Дар интиҳо ба волидон Хушнуддин Эргашев, Комилҷон Бойназаров, Тухтасун Абдураҳмонов, Фозилҷон Шодмонзода барои тарбияи хуби фарзанди ҳушёру қобил ва пурмасъулият ва хизмати софдилона, ҳушёриву далерии фарзанд бо Сипосномаи Вазорати мудофиаи Ҷумҳурии Тоҷикистон ва туҳфаи Мақомоти иҷроияи ҳокимияти давлатии шаҳр сарфароз гардиданд. Ҳамчунин ба панҷ наваскарони пешоҳанг, ки курси махсуси ронандагии Ташкилоти ҷамъияти мададгори мудофиаи вилояти Суғд бомуваффақият хатм намудаанд, шаҳодатномаҳои ронандагӣ дар вазъи мутантан супорида шуданд.